សកលវិទ្យាល័យល្បីៗលំដាប់កំពូលទាំង១០នៅស្រុកខ្មែរ

បើនិយាយដល់រឿងសកលវិទ្យាល័យ សិស្សឬអាណាព្យាបាលមួយចំនួនតែងតែចង់អោយខ្លួនឯងឬកូនចៅរបស់ខ្លួនបានចូលរៀនសាលាល្អ ល្បីព្រមទាំងមានគុណភាពអប់រំខ្ពស់ដើម្បីអោយពួកគេមានសមត្ថភាពគ្រប់គ្រាន់និងក្រេឌីតពីសាលាល្អ ងាយស្រួលក្នុងការរកការងារធ្វើ ដោយមិនបារម្ភរឿងប្រើអំពើរឿងទាត់ខ្យល់ជំនួសបាល់ក្រោយពេលរៀនចប់។ដូច្នេះអ្នកទាំងអស់គ្នាអាចជ្រើសរើសឬពិចារណាសកលវិទ្យាល័យខាងក្រោមនេះបាន ដោយសារតែវាជាបញ្ជីដែលចេញដោយវេបសាយល្បីឈ្មោះរបស់អឺរ៉ុបដែលតែងតែធ្វើបញ្ជីសកលវិទ្យាល័យល្បីៗបំផុតទូទាំងពិភពលោក៖

1. សកលវិទ្យាល័យពុទ្ធិសាស្រ្ត(UP)៖ សកលវិទ្យាល័យមួយនេះទទួលបានចំណាត់ថ្នាក់ល្អជាងគេ ក្នុងចំណោមសកលវិទ្យាល័យទាំងអស់នៅស្រុកខ្មែរសម្រាប់វេបសាយមួយនេះ។អ្នកប្រហែលជាឆ្ងល់ថាវាល្អជាងសាលារដ្ឋបានដោយរបៀបម៉េច ចម្លើយគឺអាចសាកសួរបទពិសោធន៍និសិ្សតដែលរៀននៅទីនោះផ្ទាល់ទើបអាចដឹងច្បាស់។

2. សកលវិទ្យាល័យភូមិន្ទភ្នំពេញ(RUPP)៖វាដូចជាគ្មានអ្វីរៀបរាប់ច្រើនដោយសារតែវាសកលវិទ្យាល័យដ៏ធំនិងចំណាស់ជាងគេនៅស្រុកខ្មែរ ដូច្នេះមិនពិបាកឆ្ងល់ច្រើន។

3. វិទ្យាស្ថានបច្ចេកវិទ្យាកម្ពុជាឬ តិចណូ⁣(ITC)៖ អ្នកណាៗក៏ស្គាល់មួយនេះដែរ ដោយសារវាជាសាលាពិបាកចូល មិនងាយចេញ។ដូច្នេះមិនឆ្ងល់ទេដែលវាមានឈ្មោះក្នុងបញ្ជីនេះដែរ។

4. សកលវិទ្យាល័យភូមិន្ទកសិកម្ម (RUA)៖ សាលាបណ្តុះបណ្តាលវិស័យកសិកម្មដែលបានបណ្តុះបណ្តាលធនធានមនុស្សយ៉ាងច្រើនទៅលើវិស័យមួយនេះ។ដូចនេះមិនចម្លែកទេដែលវាក្លាយជាសកលល្បីនៅស្រុកខ្មែរនោះ។

5. សកលវិទ្យាល័យបញ្ញាសាស្រ្ត(PUC)៖ លេខកូដជោគជ័យសម្រាប់សសកលវិទ្យាល័យមួយនេះគឺបណ្តុះបណ្ដាលជំនាញ​ភាសាអង់គ្លេស។ការពិតទៅវាមានមុខជំនាញដទៃទៀតប៉ុន្តែអង់គ្លេសរៀងលេចធ្លោជាងគេ។ហើយសម្រាប់អ្នកសិក្សានៅទីនោះគ្មានមួយណាដែលមិនពូកែអង់គ្លេសនោះទេ។

6. សកលវិទ្យាល័យកម្ពុជា(UC)៖ សកលវិទ្យាល័យមួយនេះក៏មិនចាញ់សកលវិទ្យាល័យដទៃប៉ុន្មាន ព្រោះថាកម្រិតគុណភាពអប់រំរបស់វា ពិតជាសាកសមដែលមានឈ្មោះក្នុងតារាង។

7. សកលវិទ្យាល័យហ្សាម៉ាន់(Zaman University)៖ វាមានដើមកំណើតពីបរទេស ចំណែកនៅកម្ពុជាជាសាខាមួយប៉ុណ្ណោះ។ដូច្នេះមិនចាំបាច់ឆ្ងល់ទេ ថាហេតុអ្វីវាលេចមុខនៅទីនេះដែរនោះ។ទាំងល្បីឈ្មោះ ទាំងការអប់រំល្អ ទាំងថ្លៃសិក្សាខ្ពស់កប់គឺវាមានទាំងអស់។

8. សកលវិទ្យាល័យបៀលប្រាយ(BBU)៖ វាល្បីឈ្មោះតាំងតែពីយូរយារមកហើយដែរ ម្យ៉ាងក៏មានសាខាតាមខេត្តទៀតផង។

9. សកលវិទ្យាល័យអន្តរជាតិ (IU)៖ សកលវិទ្យាល័យដែលផ្តោតសំខាន់លើជំនាញវេជ្ជសាស្រ្ត ទើបវាក្លាយជាសកលលេចធ្លោមួយ។

10. សកលវិទ្យាល័យភូមិន្ទនិតិសាស្រ្ត និងវិទ្យាសាស្រ្តសេដ្ឋកិច្ច (RULE)៖ ភ្លេចយ៉ាងម៉េចបាន សាលាសំដាប់ជួរមុខប្រទេសដែលបណ្ដុះបណ្តាលជំនាញផ្នែកច្បាប់ធំជាងគេនៅស្រុកខ្មែរ។

ទាំងនេះជា១០ចំណាត់ថ្នាក់ដែលខ្ពស់បំផុតដែលយើងបានដកស្រង់ចេញមក ប៉ុន្តែជាវាមិនទាន់អស់ទេនៅមានសកលវិទ្យាល័យវិទ្យាសាស្រ្តសុខាភិបាលលេខ១១ សកលវិទ្យាល័យជាតិគ្រប់គ្រងលេខ១២ និងសកលវិទ្យាល័យភូមិន្ទវិចិត្រសិល្បៈលេខ១៣។តាមពិតទៅវាពិតជាភ្ញាក់ផ្អើលមែនទែន ដែលចំណាត់ថ្នាក់ដំបូងទាំង១០មានលេចចេញសកលវិទ្យាល័យឯកជនច្រើន ព្រមទាំងរុញសកលវិទ្យាល័យរដ្ធអោយធ្លាក់លេខ។
ចំពោះអ្នកអានមួយចំនួនអាចនឹងឆ្ងល់ថាហេតុអ្វីចំណាត់ថ្នាក់ខុសគ្នាពីវេបសាយមួយទៅវេបសាយមួយ?ចំពោះតាមការបកស្រាយគឺមកពីការគិតរបស់អ្នកធ្វើបញ្ជី សម្រាប់វេបសាយខ្លះគ្រាន់តែចូលទៅឆែកវេបសាយ បើសិនជាវេបសាលាមួយណាមានអ្នកចូលទៅមើលច្រើនពួកគេអោយចំណាត់ថ្នាក់ល្អ ចំណែកវេបសាយខ្លះទៀតគេពិនិត្យមើលស្ថានភាពជាក់ស្តែងមកវាយតម្លៃបន្ថែម។

ប្រភព៖ Webmetric